Ye kya ke sab se bayaan dil ki haalatein karani
'Faraz' tujh ko na aaiien muhabbatein karnii
Ye qurb kyaa hai ke tuu saamane hai aur hamein
Shumaar abhii se judaaii kii sa'atein karni
Koii khudaa ho, ke patthar, jise bhii hum chaahein
Tamaam umr usii kii ibaadatein karni
Sab apane apane qariine se muntazir us ke
Kisii ko shukr, kisii ko shikaayatein karni
Hum apane dil se hain majbuur aur logon ko
Zaraa sii baat pe barpaa qayaamatein karni
Milein jab un se to mubaham sii guftaguu karnaa
Phir apane aap se sau-sau vazaahatein karni
Ye log kaise magar dushmanii nibhaatein hain
Humiin ko raas na aaiien muhabbatein karni
Kabhii 'Faraz' naye mausamoon mein rou denaa
Kabhii talaash puraanii raqaabatein karni