محبت چیز ایسی ہے

**sarfraz_qamar** · 26-10-2011, 01:00 AM

سنا تھا ہم نے لوگوں سے

محبت چیز ایسی ہے

چھپائے چھپ نہیں سکتی

یہ آنکھوں سے چمکتی ہے

یہ چہروں پر دمکتی ہے

یہ لہجوں میں جھلکتی ہے

دلوں تک کو گُھلاتی ہے

لہو ایندھن بناتی ہے

اگر سچ ہے . . . . . تو پھر آخر ہمیں

اس ذاتِ حق سے یہ بھلا کیسی محبت ہے؟

نہ آنکھوں سے جھلکتی ہے

نہ چہروں پر ٹپکتی ہے

نہ لہجوں میں سُلگتی ہے

دلوں کو آزماتی ہے نہ راتوں کو رُلاتی ہے

کلیجے مونہہ کو لاتی ہے نہ فاقوں سے ستاتی ہے

نہ خاک آلود کرتی ہے نہ کانٹوں پر چلاتی ہے

نہ یہ مجنوں بناتی ہے

عجب ایسی محبت ہے فقط دعویٰ سُجھاتی ہے

نہ کعبے کی گلی میں تن پہ انگارے بجھاتی ہے

نہ غارِ ثور میں چُپ کے سکینت بن کے چھاتی ہے

حرا تک لے بھی جائے. . .قُدس سے آنکھیں چُراتی ہے

ہم اپنے دعوٰئےحق ِ محبت پر ہوئے نادم

تو پلکوں کے کناروں سے جھڑی سی لگ گئی اور پھر

کہیں سے بجلیاں کُوندیں

صدا آئی

ذرا اس آنکھ کی بندش کے دم بھر منتظر رہنا

وہاں خود جان جاؤ گے

!!!محبت کی حقیقت کو