میری آنکھوں کی خواہش سوچتی ہے

**sooni** · 01-09-2012, 01:48 AM

اُفق کے اُس طرف رَستہ بھی ہو گا
پسِ دیوار اِک سایا بھی ہو گا

نہ جاؤ اُس کی گُم صُم سادگی پر
سمندر ہے تو وہ گہرا بھی ہو گا

گھِرا رہتا ہے اب جو دوستوں میں
کبھی میری طرح تنہا بھی ہو گا

ذرا سی تشنگی کی ضد نہ مانو
سرابوں سے اُدھر صحرا بھی ہو گا

ہوا تاریک شب سے پوُچھتی ہے
کِسی گھر میں دیا جلتا بھی ہو گا

کٹے ہاتھوں سی یہ بنجر دراٹیں
کبھی اِن میں کوئی دریا بھی ہو گا

جُدا ہوتے ہوئے اُس اجنبی نے
میرے بارے میں کچھ سوچا بھی ہو گا

میری آنکھوں کی خواہش سوچتی ہے
پلٹ کر اُس نے پھر دیکھا بھی ہو گا

مجھے پڑھتا رہا ہو گا سفر میں
وہ گھر میں دیر تک سویا بھی ہو گا

کہاں تک دل کی ضِد مانو گے "محسن"
یہ بچّہ ایک دِن بوڑھا بھی ہو گا