Hum kaise pagal hote thay

[sweet-fairy]

Ek phool ko chooney ki khaatir
Kaantoon se zakhmi hote thay
Jo phool jholi mein aa girta
Ussay choone se dar jaate thay

Hum kaise pagal hote thay

Ke dhundhle aaenoon mein apna
Hum aks sa dhoondha karte thay
Aur kircheyaan chitkhey aaenoon ki
Mutthi mein daba kar rakhte thay

Hum kaise pagal hote thay

Jab sarak pe chalna hota thaa
Hum kashti le kar chaltay thay
Aur beech bhanwar jaane ke leye
Hum paidal nikla karte thay

Hum kaise pagal hote thay

Jab baarish barsa karti thee
Hum chatri mein chup jaate thay
Aur jalti dhoop main nange sar
Hum chat per uchla karte thay

Hum kaise pagal hote thay

Jab paas bahat woh hota thaa
Hum us ko dekh na saktey thay
Jab door chala jata tha woh
Hum aahat us ki suntey thay

Hum kaise pagal hote thay

Jab saari duniya soti thee
Hum chaand se khela karte thay
Jab saari duniya jaag uth'tee
Tu thak kar hum so jaate thay

Hum kaise pagal hote thay

Hum kitne pagal hotay thay
Hum aaj bhi waise pagal hain
Per phir bhi aksar sochtay hain
Hum kaise pagal hote thay...