کیاصباکوچہ دلدار سے توآتی ہے

**sarfraz_qamar** · 19-07-2013, 02:55 AM

کیاصباکوچہ دلدار سے توآتی ہے
مجھ کواپنے دل گم گشتہ کی بوآتی ہے

صاف ہے سینہ ہمارا کہ نہ دل ہے نہ جگر
کیاصفائی تجھے اے آئینہ روآتی ہے

نہ کیاتونے کبھی غیر کاشکوہ ہم سے
بات کہنے ہی میں اے عربدہ جوآتی ہے

ہورساآہ توکیاجانے کہاں تک پہنچے
نارسائی میں تویہ عرش کوچھوآتی ہے

تیری تلوار نے بھی چال اُڑائی تیری
کھینچ کے آتی ہے یہ جب تابہ گلو آتی ہے

دشمنی ختم ہوئی ایک وفادشمن پر
دوستی تجھ کو تواے میرے عدوآتی ہے

تلخیِ موت کو فرہادکی وہ کیاجانے
مُنہ سے شیریں کے ابھی دودھ کی بوآتی ہے

یادآجاتی ہے وہ چین جبیں دیکھ کے موج
لہر سی دل میں ہمارے لب جوآتی ہے

شجر خشک توہرسال ہرے ہوتے ہیں
جاکراے عمر جوانی کہیں توآتی ہے

دل اگرصاف نہ ہوپاک نہ ہوگا انسان
یوں توابلیس کوبھی شرط وضوآتی ہے

جانتاہوں کہ یہی دشمن جان ہے میرا
اُس کے خنجرسے مجھے خون کی بو آتی ہے

محفل یارمیں اے داغ سواحسرت کے
کب ہمیں کیفیت جام وسبوآتی ہے