کوئٹہ گلیڈی ایٹرز نے سلطانوں کے تخت پر فتح کا جھنڈا لہرادیا
aa.jpg
پاکستان سپر لیگ کے آٹھویں میچ میں ملتان سلطانز کو 8وکٹوں سے شکست دی،ایونٹ میں اب تک ناقابل شکست رہتے ہوئے جیت کی ہیٹرک مکمل کی کوئٹہ نے 161رنز کا ہدف 19ویں اوور میں حاصل کیا،روسو کے ناقابل شکست 67رنز،شین واٹسن کی شاندار نصف سنچری، میچ کے بہترین کھلاڑی قرار

شارجہ(سپورٹس ڈیسک) پی ایس ایل کے آٹھویں میچ میں کوئٹہ گلیڈی ایٹرز نے شاندار کارکردگی کے سلسلے کو برقرار رکھتے ہوئے ملتان سلطانز کو 8 وکٹوں سے شکست دے دی۔ایونٹ میں اب تک کی ناقابل شکست کوئٹہ گلیڈی ایٹرز نے 161 رنز کا ہدف با آسانی حاصل کرتے ہوئے جیت کی ہیٹرک مکمل کرلی، اوپنر شین واٹسن نے ایک بار پھر عمدہ بیٹنگ کرتے ہوئے صرف 40 گیندوں پر 61 رنز کی باری کھیلی اور ٹیم کیلئے جیت کی راہ ہموار کی ان کی اننگز میں 11 چوکے شامل تھے جب کہ روسو نے 67 رنز کی ذمہ دارانہ بیٹنگ کی اور ٹیم کو فتح سے ہمکنار کر ادیا وہ ناٹ آؤٹ رہے ، عمراکمل نے 17 رنز کی باری کھیلی۔ملتان سلطانز کی جانب سے محمد عرفان اور شاہد آفریدی نے ایک ایک وکٹ حاصل کی۔اس سے قبل کوئٹہ گلیڈی ایٹرز کے کپتان سرفراز احمد نے ٹاس جیتا اور فیلڈنگ کو ترجیح دیتے ہوئے سلطانز کو بیٹنگ کرنے کی دعوت دی، سلطانز نے مقررہ اوورز میں 9 وکٹوں کے نقصان پر 160 رنز بنائے ، کپتان شعیب ملک نے جارحانہ بیٹنگ کرتے ہوئے شاندار نصف سنچری سکور کی، انہوں نے صرف 37 گیندوں پر 2 چھکوں اور 4 چوکوں کی مدد سے 53 رنز بنائے جب کہ جیمز ونس 28، شان مسعود 18،ایون 10، کرسٹن اور رسل 18،18، شاہد آفریدی صفر، نعمان علی 2، علی شفیق اور شکیل انصر بغیر کوئی رن بنائے پویلین لوٹے ۔کوئٹہ گلیڈی ایٹرز کی جانب سے محمد عرفان جونیئر اور غلام مدثر نے 2،2 جب کہ سہیل تنویر، محمد نواز اور فواد احمد نے ایک ایک وکٹ حاصل کی۔شین واٹسن شاندار نصف سنچری بنانے پر میچ کے بہترین کھلاڑی قرار پائے ۔ایونٹ میں دونوں ٹیموں کا یہ تیسرا میچ تھا، گلیڈی ایٹرز اب تک ناقابل شکست ہیں ۔