خوش ہو! کہ تِرا اُمّتِ سلطانِ مدینہ
نعتِ پاک در زمینِ جگر مرادآبادی
خوش ہو! کہ تِرا اُمّتِ سلطانِ مدینہ
ہے رزقِ سخن مدحتِ سلطانِ مدینہ
قرآن کے سانچے میں جو حسان کا لہجہ
ڈھل جائے تو ہو مدحتِ سلطانِ مدینہ
خالق کی زباں لہجہِ قرآنِ مقدس
لازم ہے پئے مدحتِ سلطانِ مدینہ
میں سینکڑوں صدیوں کے سمندر کو کھنگالوں
مِل جائے جو یک ساعتِ سلطانِ مدینہ
اللہ کی ہر ایک صفت ہو کے مجسم
اُتری بخدا صورتِ سلطانِ مدینہ
جب جان ہو یارب مری آغوشِ اجل میں
ہو پیشِ نظر تربتِ سلطانِ مدینہ
فاقوں کی چٹائی پہ رکھے فقر کے لقمے
کھائے بخوشی عترتِ سلطانِ مدینہ
آئینہِ تاریخ کی آنکھوں میں ہے محفوظ
اللہ غنی ! سیرتِ سلطانِ مدینہ
قرآن کی سورت کا ہر اک حرف مکمل
حافظ ہے تِرا صورتِ سلطانِ مدینہ
حیرت سے تکیں قیصر و کسرٰی کے خزانے
نایاب ہے وہ دولتِ سلطانِ مدینہ
تاریخ میں جس نے نئی تاریخ رقم کی
وہ فلسفہ ءِ ہجرتِ سلطانِ مدینہ
بیٹھے پرِ پروازِ تخیل پہ مسلسل
ہے گرمِ سفر رفعتِ سلطانِ مدینہ
کہلائے گا تا حشر وہ مخدومِ زمانہ
اک پل جو کرے خدمتِ سلطانِ مدینہ
اللہ سے بندوں کو مِلاتی ہے جو پروؔیز
ہے بس وہ فقط نسبتِ سلطانِ مدینہ
ــــــــــ از پروؔیز اشرفی احمد آبادی ــــــــــــــــ
Reply With Quote
Re: خوش ہو! کہ تِرا اُمّتِ سلطانِ مدینہ
Originally Posted by intelligent086
