حضرت نبی کریم ﷺ کی اہم نصیحتیں

**intelligent086** · 25-03-2019, 04:07 AM

حضرت نبی کریم ﷺ کی اہم نصیحتیں

حضرت عبداللہ بن عباس ؓبیان کرتے ہیں کہ ایک دن آپؐ کے پیچھے سواری پر بیٹھا ہوا تھا کہ حضرت رسول اللہ ﷺ نے نصیحتیں فرمائیں۔

اللہ کے حق کی حفاظت کرو:

۔تم اللہ کے حق کی حفاظت اور نگرانی کرو اللہ تمہاری حفاظت کرے گا۔ اس کا مطلب یہ ہے کہ تم اللہ کے احکام کی تعمیل کرو، شریعت اور سنت نبویؐ تمہاری زندگی سے ظاہر ہوتی ہو، نماز میں ، روزہ میں ، زکوٰۃ وصدقہ خیرات میں ، اخلاق میں ، گفتگو میں ، معاشرہ میں اللہ کے حکم او ر نبی کریم ﷺکی سنت کے تم پابند ہوجائو اللہ تعالیٰ بھی دنیا وآخرت کی ہر مشقت اور ہرپریشانی سے تمہاری حفاظت اور تمہاری دستگیر ی کرتارہے گا۔ نیز تم اللہ کے حق کی حفاظت کرو، شریعت کے پابند ہوجائو گے تو تم ہر وقت اللہ تعالیٰ کو اپنے سامنے پائو گے ۔ جب اللہ تعالیٰ ہر وقت تمہارے سامنے ہے تو تم کو پھر کسی اور کا محتاج ہونے کی ضرورت نہیں اور جب اللہ کی طاقت تمہارے ساتھ ہے تو تمہارا کون کیا بگاڑسکتاہے ۔

صرف خدا سے مانگو:

۔دوسری نصیحت آپ ﷺ نے یہ فرمائی کہ جب تمہیں کچھ مانگنے کی ضرورت پیش آ جائے تو صرف اللہ سے مانگو اللہ تعالیٰ کی دولت کا سمندر اتنا وسیع ہے کہ انسانی عقل حیران اور ششد ر ہے۔ اگر اللہ تعالیٰ سب کو ان کی تمنا اور آرزوئوں کے مطابق دے دے تو اس کی دولت میں سے اتنا بھی نہیں جاتا جتنا سمندر میںسے سوئی کی نوک میںآسکتا ہے ۔ اور وہ صاحب دولت بھی خوش نصیب ہے کہ ادھر تم اللہ سے مانگتے ہو اور ادھر اللہ پاک اس کے دل میں ڈال دیتاہے اور بے چین ہوکر تمہارے پاس لے کر آتاہے اور اگر تم اس کو قبول کرلیتے ہو تو وہ اپنی خوش نصیبی سمجھتا ہے۔

تم بھی مقبولِ بار گاہ ہوئے اور اس کی دولت کو بھی عنداللہ شرف قبولیت حاصل ہوا تم نے تقویٰ اختیار کیا اور اس کامال ایک متقی کو پہنچ گیا۔حضرت رسول اللہﷺ نے ارشاد فرمایا کہ تم مومن کے علاوہ کسی دوسرے کو اپنا دوست ہرگز مت بنائو اور تمہارے یہاںکا کھانا متقی لوگوں کے علاوہ کوئی دوسرا کھانے نہ پائے ۔لہٰذا تمہارا دوست بھی کامل ہونا چاہیے اور تمہارے مہمان بھی متقی لوگ ہونے چاہئیں۔(ترمذی : ۲/۶۵)

صرف اللہ سے مدد مانگو:۔

تیسری نصیحت آپ ﷺ نے یہ فرمائی ہے کہ جب تم کسی مصیبت ، دشواری میں مبتلا ہوجائو ۔ کسی پریشانی میں ، بیماری میں ، دشمنوں کے نرغہ میں آجائو اور ہر طرف سے تمہیں ستایا جارہا ہو تو ایسے حالات میں تمہارا دستگیر صرف اللہ تعالیٰ ہے ، اس لیے صرف اسی سے فریاد کرو اور اسی سے مدد مانگو۔

مخلوق تم کو نفع نہیں پہنچاسکتی :

۔چوتھی نصیحت یہ فرمائی کہ اگر دنیا کے تمام انسان اور تمام اُمت مل کر تم کو کسی بات کا نفع پہنچانا چاہیں تو اس سے زیادہ

ایک پیسہ کابھی نفع نہیں پہنچا سکتے جو اللہ نے تمہارے مقدر میں لکھ دیا ہے ، لہٰذا مخلوق سے زیادہ اُمید یں مت باندھا کرو، یہ فضول خیالات ہیں ۔ تمہیں اپنی محنت خود کرنی ہے جو تمہارے مقدر میں ہے وہ تم کو اس بہانہ سے ملتا رہے گا اور ہر وقت خدا کی یاد تمہارے اندر غالب رہے گی ۔ ٭٭٭٭