پنجاب فوڈ اتھارٹی کے شہید اہلکار کی عظیم قربانی کا تذکرہ

**intelligent086** · 08-06-2019, 03:28 AM

پنجاب فوڈ اتھارٹی کے شہید اہلکار کی عظیم قربانی کا تذکرہ

aa.jpg

طلحہ ملک
خونِ دل دے کر نکھاریں گے رخِ برگِ گلاب
ہم نے گلشن کے تحفظ کی قسم کھائی ہے۔۔

میرے ابو آئے ہیں؟؟ نظر نہیں آرہے ؟؟ بیٹی۔۔ رکو۔۔ رکو۔۔۔!!نہیں۔۔ مجھے میرے ابو سے ملنا ہے۔۔ میرے کپڑے لائے ہیں ،،میری چوڑیاں آئی ہیں۔۔ابو۔۔ابو۔۔ یہ وہ صدائیں ہیں جوعمران شہید کی6سالہ بچی کی اب تک میرے کانوں میں گونج رہی ہیں۔اس کے پیچھے دوڑتا آیا 4سالہ معصوم بچہ جو مسکراتی آنکھوں کے ساتھ مجھے دیکھتا ہی جا رہا تھا جسے یہ بھی نہیں پتہ کہ یہ شخص کون ہے اور کیوں آیا ہے؟؟
وہ بس اپنی بہن کو مجھ سے باتیں کرتا دیکھتا رہا اور خاموشی سے مسکراتا رہا ،اسے کیا پتہ کہ اس کا باپ چند لمحے قبل دارِ فانی سے کوچ کر گیا ہے۔وہ باپ جس نے آپکے اور ہمارے بچوں کو زہر بانٹنے والوں کا پیچھا کرتے کرتے اپنی جان قربان کر دی ہے۔

جڑانوالہ کے قریب گائوں میں جہاں ضعیف العمر باپ دونوں ہاتھ اٹھائے صدائیں بلند کرتا رہا کہ کہاں چلا گیا ہے تُو ۔۔ کہاں چلا گیا ہے تُو ۔۔اتنا بوڑھا باپ جسے میری بارہا صبر صبر کی آوازیں سنائی تک نہ دیتی تھیں۔ وہ باپ جس کی آنکھوں کی بینائی کمزور اور سننے کی حس آخری سانسوں پر ہے۔ گائوں کے لوگ صبر کی تلقین کرتے تو بوڑھا باپ اپنے دونوں ہاتھ آسمان کی طرف اٹھائے آنکھوں سے آنسو بہاتا تھا۔ غم سے نڈھال باپ کبھی اپنے بیٹے کی میت کی طرف دیکھتا تو کبھی آسمان کی طرف۔۔ اسے اپنے بیٹے کی شہادت پہ ناز اوربیک وقت اسکی جدائی کا غم بھی تھا ۔۔سارے کا سارا گاؤں قطا راندرقطار دلاسہ دینے آتا رہا۔۔ غمزدہ باپ کا چہرہ اس وقت فخر سے بلند ہوا جب پنجاب فوڈ اتھارٹی کے ڈائریکٹر جنرل کیپٹن (ر) محمد عثمان اپنے افسران کے ہمراہ آئے اور عمران شہید کے باپ کو گلے سے لگایا اور بوڑھے باپ کو بیٹے کی فرض شناسی اور عظیم مقصد کی خاطر قربان ہونے پر خراجِ تحسین پیش کیا۔ یہ وہ لمحہ تھا کہ جب بوڑھا باپ اور سارا گاؤں جواں سالہ عمران کی شہادت پر فخر کر رہا تھا ۔

عمران شہید کا چھوٹا بھائی جو ہوبہوانہی کی طرح دِکھ رہا تھا۔ کبھی ایک گلے سے لپٹ کر اور کبھی دوسرے گلے سے لپٹ کربھائی کی جدائی کے غم کو آنسوئوں میں بہا رہا تھا۔اس کی زبان سے نکلنے والے الفاظ تھے کہ ہر آنکھ اشکبار تھی۔ وہ شخص تھا تو میرا بھائی مگر بوڑھے باپ کے تمام فرائض ادا کرنیوالا،جس نے عید سے قبل آنے کا وعدہ کیا تھا مگر آج اپنے سہارے پر آنے کی بجائے سائرن بجاتی گاڑی میں سفید کپڑے میں لپٹا ہوا آیا ہے۔ عید کی خوشیوں کو دوبالا کرنیوالا تما م خوشیاں ماند کر گیا ہے۔جدائی کے نقوش ہماری زندگی کی راہوں میں چھوڑ گیا ہے۔ دھاڑیں مار مار کر روتی عمران شہید کی بیوہ جسکی پہلی اور آخری امید ،چند روز قبل عید کی خریداری کا وعدہ کر کے جانیوالا،اسکی آنکھوں کے دیکھے ہوئے خوابوں کو حقیقت میں بدلنے والا،اسکے حقوق کا محافظ اس دھرتی پر جان نچھاور کر کے چلا گیا ۔ جی ہاں ایس ایس جی ریٹائرڈ کمانڈو عمران شہید کی بات کر رہا ہوں جو جمعرات کی صبح صحت دشمن عناصر پر کاری ضرب لگانے جا رہا تھا کہ اچانک موٹروے پر پیش آئے حادثے میں اپنی جان جانِ آفریں کے سپرد کر گیا ۔

پنجاب فوڈ اتھارٹی کا ملازم عمرا ن اور اس دھرتی کا بہادر سپوت جوملاوٹ مافیا کیخلاف سینکڑوں کارروائیوں میں پیش پیش رہا تاکہ ملاوٹ زدہ خوراک میرے اور آپکے گھروں تک پہنچنے سے دور رہیں. کئی بچوں کی زندگیاں،کئی گھر اس خاموش زہر قاتل سے لقمہ اجل بننے سے محفوظ ہیں،آج یہ سب سوال میرے سامنے ایک پہاڑ نما دیوار بنائے کھڑے ہیں جنہوں نے مجھے اس تحریر پر مجبور کر دیا ہے۔

ملاوٹ مافیا کی طرف نظر دوڑاتا ہوں تو مجھے یونانی دیومالائی کہانیوں کا وہ ہیبت ناک کردارذہن میں آتاہے جس کے ان گنت چہرے ہیں اورہر طرف سے ڈستا ہے۔ ملاوٹ بھی ایک ایسا ہی عفریت ہے جو کئی شکلوں میں ہماری اور ہمارے بچوں کی صحت سے دن رات کھلواڑ کر رہا ہے۔ نونہالوں کیلئے بکنے والے دودھ سے لے کر روزمرہ اشیائے خورونوش کی تمام اقسام میں ملاوٹ عام ہوچکی ہے۔وہ دودھ جسے مکمل غذا سمجھا جاتا ہے اس میں کیا کچھ ملایا جاتا ہے میرے وہم و گما ن میں بھی نہ تھا۔ایسے جان لیوا کیمیکلز کا استعمال کر کے ہماری آنیوالی نسلوں کو ذہنی اور جسمانی معذور بنادیا گیا ہے کہ سوچا جائے تو اللہ کی پناہ ۔صحت مند مشروبات کی بجائے مصنوعی مٹھاس اور زہریلے مادے جو ہمارے پیسوں سے ہماری دہلیزوں پر ہماری ہی صحت سے کھلواڑ کر رہے ہیں۔ چندسال قبل تک تو ہم آنکھیں موندھ کر سب اچھا کا راگ الاپتے آئے ہیں مگر حقیقت عیاں ہونے کے بعد رونگٹے کھڑے ہوجاتے ہیں۔

یہ حقیقت ہے کہ کچھ سال قبل صحت بخش اور ملاوٹ سے پاک خوراک کے بارے میں اس قدرآگاہی نہ تھی جتنی آج ہے۔ ہر طرف جعل سازی اور ملاوٹ کر نیوالوں کی چاندی تھی ۔ جعل ساز مافیا محض منافع کمانے کی خاطر شب و روزلوگوں کی صحت سے کھیل رہاتھا۔ایک طرف مسلمان ہونے کا دعویٰ تو دوسری جانب اپنے ہی ایمان اوردین سے روگردانی کرنے والے،جن کے بارے میں رحمت العالمین کا کھلم کھلا اعلان ہے کہ ’’جس نے ملاوٹ کی وہ ہم میں سے نہیں‘‘ تو پھر وہ کون ہیں جو انسانی صحت کو دن رات بیماریوں کے سمندر میں دھکیل رہے ہیں؟؟ ہمارے معاشرے کی خوراک ہو یا روایات ،عبادتیں ہوں یا معاملات سب کی سب ملاوٹ سے بھری پڑی ہیں۔ بلاشبہ ملاوٹ کے عفریت میں مبتلا انسان نما درندوں کی درندگی کو روکنے میں پنجاب فوڈ اتھارٹی کا اہم کردار ہے۔ بلاتفریق ہر شخص ان کی کارروائیوں کا معترف ہے جو ملاوٹ کو جڑ سے اکھاڑنے کیلئے دن رات کی جا رہی ہیں۔ ایسے چہرے بھی بے نقاب ہوئے جو زہر کو شہد کہہ کر لوگوں کو بیچ رہے تھے۔ہمارے گردونواح میں ملاوٹ کے کھڑے پہاڑوں کے سامنے سیسہ پلائی دیوار بنے ادارے کے سپوت کی شہادت قابلِ فخر ہے۔

ایک جانب وطنِ عزیز کی سرحدوں کے محافظ جب فرض شناسی میں اپنی جانیں جانِ آفریں کے سپردکرتے ہیں تو وہ ادارے اپنے سپوتوں کے اہلخانہ کی نہ صرف مالی مدد کرتے ہیں بلکہ شہداء کے بچوں کی کفالت بھی انکے ذمہ ہوتی ہے۔اسی طرح پنجاب فوڈ اتھارٹی کا یہ ملازم میرے اور آپکے اہلخانہ تک پہنچنے والی خوراک کی حفاظت کرتے ہوئے قربان ہوگیا ہے ۔اب حکومتِ پنجاب اور فوڈ اتھارٹی کوعمران شہید کے اہلخانہ کی مالی امداد کا انتظام کرنا چاہیے۔ غمزدہ خاندان کی مالی معاونت کے ساتھ ساتھ شہید کی بیوہ اور بچوں کیلئے ماہانہ وظیفے کا اعلان بھی ہمارے شہداء کے وارثوں کا حق بنتا ہے۔حکومت وقت کے ان اقدامات سے جہاں نیک نامی ہوگی وہاں شہداء کےاہلخانہ معاشی پریشانیوں سے بھی محفوظ رہیں گے۔

بلاشبہ یہ سب کاوشیں اس خاندان کے غم کا مداوا تو نہیں کر سکیں گی مگر عمران شہید کی کامیابیوں اور عظیم مقصد کے حصول کی خاطر جان قربان کرنے کے عوض یہ مطالبہ کیا جا سکتا ہے۔اللہ تعالیٰ سے دعا ہے کہ ملکی سرحدوں کی حفاظت کرنیوالوں کے ساتھ ساتھ ہماری خوراک کے ان محافظوں کو بھی اپنی امان میں رکھے۔آمین
٭٭٭٭٭٭٭٭٭٭٭