انجم قریشی
پِھکا گٹا
تیرے باجھوں جیونا انج اے
جیویں پھکا گٹا
نِکھد، چلی، کھولی، جندڑی
وگار کَٹدی خوشی، نٹھ جان دی اُڈیک وچ اے
ٹُٹدی بجھدی آس دے دھکے کھاندیاں
جندڑی لنگھ رہی اے
تیرے باجھوں جیونا انج اے
جیویں بھر ٹھنڈوچ خالی انگیٹھی
تیری بانہہ سِر تھلے رکھ کے سو جان نوں
جس وی شے دے نال وٹاواں
او سِلھی اے
ٹھردیاں اکھاں وچ نیندر ای نہیں
تیرے باجھوں جیونا انج اے
جیویں گھڑمس،اوبھڑ ساک
بولی اچمنی، بے سکونا سُکھ
جیویں ارک تے سَٹ
جیویں گجدے وجدے ڈھول نال
ڈورے دا بھنگڑا
تیرے بابجھوں جیونا انج اے
جیویں ننگے پیر تتی ریت دے پینڈے
سُکھ نال اِٹ کُتے دا ویر اے
رَگڑ رمزاں کولوں سفنیاں دی اُگراہی
بڑا اچرج کم اے
تیرے باجھوں جیونا انج اے
جیویں ہوش وچ لتھا موڈھا چڑھاؤنا
جیویں پھٹ نوں بنا سُن کیتیاں سوانا
قہراں دی گڈی نے کدی کسے نوں
سُکھ دے ٹیشن تے وی لاہیا اے
جندڑی سنگھ رہی اے
SD lover
پِھکا گٹا ۔۔۔۔ انجم قریشی (پنجابی)
Posting Permissions
Reply With Quote
Re: پِھکا گٹا ۔۔۔۔ انجم قریشی (پنجابی)