Tribute To Samina Raja

[Rubia]

***

Shamma ki tarha yeh shola bhi tha ik raat ki baat
Ab khuli ham pay teri chashm-e-mdaraat ki baat

Ham ke jis baat pay tajj aay thay saari dunya
Teray nazdeek hamesha woh rahi baat ki baat

Teray altaaf ki barish say shraboor tha dil
Yaad parti hai yeh guzri hoei barsaat ki baat

Aankh mein jesay kisi khwab nagar ka manzar
Hoant par us kay kisi shehr-e-tilismaat ki baat

Khud framoshi ki ummid pay aa bethay thay
chhaer di too nay bhi aakhir,wohi halaat ki baat

Jesay ik umr pay chhaei ho syahi iss ki
Yeh gham-e-hijr hai kehnay ko to ik raat ki baat

***

[Rubia]

PIYA BAAJ PYALA PIYA JA'AY NA

Mujhay aisi doori ki aadat nahin thi
ke jo zindgi ki ragon say
jawan khoon ki
aakhri boond takk khainch lay,
jism ka khaet banjar karay,

iss li'ay jabb say too
uss safar parr gaya
main nay aaiyna dekha nahin,
saari dunya say
aur aasman takk say parda kiya,

main nay sardi mein dhoop
aur garmi mein sa'ay ki parwa na ki,
zindgi ko na samjha kabhi zindgi,
aad'tann saans li!

bhook to marr ga'ei thi
juda'ei ki pehli hi sa'att mein
lekin abhi pyaas baaqi hai
aur aisi zalim, ke meray badan parr
babool ugg rahay hain,
zuban parr bhi kantay paray hain,

mujhay aisi doori ki aadat nahin hai
ke jo mot aur zindgi mein
ko'ei farq rehnay na day
phirr bhi yeh jaan lay---
garr mujhay chashma e aab e hewan
bhi mill ja'ay--- ikk boond
teray bina, mujh pe ja'yez nahin!

***

[Rubia]

***

Dasht mein ik telism e aab kay saath
Door takk hamm gaey sarab kay saath

Phir khizan aaei aur khizan kay baad
Khaar khilnay lagay gulaab kay saath

Raat bharr toot'ti huwi neendein
Jurr gaein sehr e maahtaab kay saath

Hamm sada ki tarah bujhay huway thay
Woh tha pehli si aab o taab kay saath

Chhoti umron ki pehli pehli baat
Kuchh takalluf say,kuchh hijab kay saath

Aur phir yeh nigaah e kheera bhi
Doob jaey gi aaftaab kay saath

Raat ki tashtari mein rakhi hain
Meri aankhein kisi kay khwab kay saath

Uss gali mein na kesay koei jaey
Shaam ko iss dill e kharab kay saath

Yeh faqat rasm hi nahien ay doast!
Dill bhi shamil hai intasab kay saath

***

[Rubia]

YEH HAIRAT GAAH-E-DUNYA HAI

Yeh hairat gaah-e-dunya hai
basar matt khwab mein karna
musalsal jagtay rehna,
agar iss jaa pay rehna hai

yeh mumkin hai ke bass ik aan mein
manzar badal ja'ay
nazar ka zikr kya,mehboob ka
paikar badal ja'ay

yeh mumkin hai kisi kha'ei pay hi
yakk lakht rasta khatm ho ja'ay
kabhi darya pay puhncho
aur kinara khatm ho ja'ay

yeh mumkin hai kabhi dekho
inhien qadmon main bethay kuchh
sarapa naaz logon ko
kabhi dekho qaba-e-dosti mein
sabb zamana saaz logon ko

thi jin say harf-e-khush ki aas
unn honton pay taana ho,
woh jin mein phool mumkin thay
unein hathon mein dashna ho,

buhat hushyar rehna hai
yeh hairat gahh-e-dunya hai!

***

[Rubia]

***

Chashm hairan bhi hai, ehed ki paband bhi hai
Dil jisay chahta hai uss say gila mannd bhi hai

Poshish-e-gahm pay na itna bhi koei nazan ho
Is mein halki si khushi ka kahin pewannd bhi hai

Baray,us deed say aankhon ko mila hai kuchh chaen
Lekin is dil ki tarap aaj say dochand bhi hai

Aap kay sarr mein kisi aur ka soda, herat!
Jabb isi sarr ki hmaray liay sogand bhi hai

Raat,tanhai,taaqub mein musalsal koi chaap,
Aur jabb ilm ho, aagay yeh galli bannd bhi hai

Nabz parr dast-e-masiha nahin,hai dast-e-habib
Garr yeh hatt jaey to ik aan mein dil band bhi hai

***

[Rubia]

KHULI HUWI KHIRKIYON SAY IK SHAAM



Khuli huwi khikiyon say ik shaam jhankti hai
ajeeb aalam hai
zindagi meri bheegti putliyon mein jesay
dharak rahi hai,
tumhari yaadon kay sa'ay sa'ay
dhundalka paeron ki chotiyon parr
utar raha hai
shafaq khamoshi say phail karr
door takk bikhartay haseen manzar kay
canvas parr
hazar ranngon pay
ik gulabi chirak rahi hai

main tumm say kitni hi door hoon
parr tumhari qurbat ki taez hiddat say
jall rahi hoon
main saray manzar say bhi alag hoon
magar shafaq say
wujood gulnaar ho raha hai
khuli huwi khirkiyon say
ik shaam jhankti hai!

***

[Mohammad Sajid]

Very Nice Sharing Rubia

[Rubia]

***

Aik ik lamha dill pe bhaari hai
Shaam hai aur be qarari hai

Hijr mein aik pall nahein kat'ta
Kiss tarah zindgi guzari hai

Beyaqeeni ki ik saleeb pe dill
Jeet karr bhi yeh janng haari hai

Kiss tarah jagmaga rahi hai nazar
Yeh muhabbat ki meena kari hai

Door hadd e nazar talak ik khwab
Chandni ka tilism taari hai

Ashk, lafzon say mutabar thehray
Khamshi aansoo'on say bhaari hai

Ho gaey ba shaoor waqt kay saath
Abb tamanna bhi ikhtiyari hai

Kya howi aag jo lahoo mein thi
Jism parr kesi barf baari hai

Ay Khuda!aik khwab ka marham
Aankh parr zakhm e yaad kaari hai

***

[Rubia]

AASHOAB

Kya aah bharay koei
Jab aah nahin jati
Dil say bhi zara gehri
Aur arsh say kuchh oonchi

Kya nazm likhay koei
Jabb khwab ki qeemat mein
Aadarsh ki soorat mein
Kashkoal gada'ei ka
Sha'er ko diya jaey
Aur roak liya jaey
Jabb shaer utarnay say
Badal say zara oopar
Taron say zara neechay

Kya khaak likhay koei
Jabb khaak kay medan par
Ungli ko hilanay say
Toofan nahin uth'ta
Jabb shakh pay imkan ki
Iss dasht-e-tamanna mein
Ik phool nahin khilta
Rahwar nahin ruktay
Mohoam si manzil par
Aankhon kay isharay say
Aur noor ki boondon ki
Bochhar nahin hoti
Ik neelay sitaray say

Jabb dil kay bulaway par
Iss jheel kanaray par
Peghaam nahin aata
Ik door ka bashinda
Ik khwab ka shehzada
Gulfaam nahin aata

Basti mein koei aurat
Raton ko nahin soati
Jaagi huwi aurat ki
Soei huwi qismat par
Jabb koei bhi deewana
Be chain nahin hota
Dehleez kay pathar say
Takra kay jabin apni
Ik shakhs nahin roata

Jabb neend kay shedaei
Khwabon ko tarastay hain
Aur dekhnay kay aadi
Binaei say dartay hain
Reh reh kay andheray say
Aankhon mein utartay hain

Aankhon kay ujalon say
In phool say bachchon say
Keh do k na abb nangay
Paa'on say chalein ghar mein
Iss farsh pay matti kay
Abb ghaas nahin ugti
Abb saanp nikaltay hain
Deewar say aur darr say

Abb noor ki boondon say
Mehki howi matti mein
Anmoal ujalay kay
Woh phool nahin khiltay
Abb jheel kanaray parr
Bichhray bhi nahin miltay
Basti mein koei aurat
Ratoan ko nahin soati
Aur jagnay walon say
Bbb nazm nahin hoti

Kya nazm likhay koei
Jabb jagnay,soanay mein
Paa lenay mein, khonay mein
Jabb baat kay honay mein
Aur baat na honay mein
Kuchh farq na reh jaey
Kya baat karay koei !

***

[Rubia]

Thanks for the compliments.
Yes, she is a great poet.
Why dont you create a section for her
if you like her poetry?