یہ حدیں نہ توڑ دینا , میرے دائرے میں رہنا
مجھے اپنے دل میں رکھنا میرے حافظے میں رہنا

میرا بوجھ خود اٹھانا میرا کرب آپ سہنا
میرے زخم بانٹ لینا میرے رتجگے میں رہنا

میرے منظروں میں بسنا میری گفتگو میں ہونا
میرے لمس میں ہونا میرے زائقے میں رہنا

میرا حکم خود سنانا میری مہر خود لگانا
میرے مشورے میں ہونا میرے فیصلے میں رہنا

کبھی دھوپ کے نگر میں میرا ساتھ چھوڑ جانا
کبھی میرا عکس بن کر میرے آئینے میں رہنا

کبھی منزلوں کی صورت میں میری دسترس سے باہر
کبھی سنگ میل بن کر میرے راستے میں رہنا

میرے ہاتھ کی لکیریں تیرا نام بن کر چمکیں
میری خواہشوں کی خوشبو میرے زائچے میں رہنا