تمہیں میں کس طرح دیکھوں

**Mohammad Sajid** · 24-05-2010, 09:22 PM

تمہیں میں کس طرح دیکھوں
دریچہ ہے دھنک کا اور اک بادل کی چلمن ہے
اور اس چلمن کے پیچھے چھپ کے بیٹھے
کچھ ستارے ہیں
نگاہوں میں عجب سی ایک الجھن ہے
وہ ہم کو دیکھتے ہیں اور پھر آپس میں کہتے ہیں
"یہ منظر آسماں کا تھا یہاں تک کس طرح پہنچا !
زمیں زادوں کی قسمت میں یہ جنت کس طرح آئی?"
ستاروں کی یہ حیرانی سمجھ میں آنے والی ہے
کہ ایسا دلنشیں منظر کسی نے کم ہی دیکھا ہے
ہمارے درمیاں اس وقت جو چاہت کا موسم ہے
اسے لفظوں میں لکھیں تو کتابیں جگمگا اٹھیں
جو سوچیں اُس کے بارے میں تو روحیں گنگنا اٹھیں
یہ تم ہو میرے پہلو میں
کہ خواب ۔ زندگی تعبیر کی صورت آیا ہے?
یہ کھلتے پھول سا چہرہ
جو اپنی مسکراہٹ سے جہاں میں روشنی کر دے
لہو میں تازگی بھر دے
بدن اک ڈھیر ریشم کا
جو ہاتھوں میں نہیں رکتا
انوکھی سی کوئی خوشبو کہ آنکھیں بند ہو جائیں
سخن کی جگمگاہٹ سے شگوفے پھوٹتے جائیں
چھپا کاجل بھری آنکھوں میں کوئی راز گہرا ہے
بہت نزدیک سے دیکھیں تو چیزیں پھیل جاتی ہیں
سو میرے چار سو دو جھیل سی آنکھوں کا پہرہ ہے
تمہیں میں کس طرح دیکھوں